बेळगावतून धावणार......

बेळगावतून धावणार वंदे भारत एक्सप्रेस

बेळगाव, ता.  १३ : वंदे भारत एक्सप्रेस रेल्वे बेंगळूर येथून धारवाड मार्गे बेळगावपर्यंत विस्तारीत करण्याचा आदेश रेल्वे मंत्रालयाने जारी केला आहे.

राज्यसभा सदस्य इरण्णा कडाडी यांनी ही माहिती दिली दिली असून बेळगाव जिल्ह्यातील जनतेची मागील अनेक दिवसांपासूनची मागणी पूर्ण झाल्याचेही कडाडी यांनी म्हटले आहे.

भारत सरकारच्या रेल्वे मंत्रालयाने काढलेल्या आदेशात वंदे भारत एक्सप्रेस रेल्वेचा धारवाड मार्गे बेंगळूरपासून बेळगावपर्यंत करण्यात आलेला विस्तार वेळापत्रकासह नमूद आहे. ही रेल्वे सेवा सुरू होण्याची तारीख लवकरच जाहीर केली जाणार आहे, असेही कडाडी यांनी सांगितले आहे.

वंदे भारत एक्सप्रेस क्र. 20662 ही रेल्वे दुपारी 2 वाजता बेळगाव रेल्वे स्थानकावरून प्रस्थान करून रात्री 10:10 वाजता बेंगळूर रेल्वे स्थानकावर पोहोचेल.
वंदे भारत एक्सप्रेस क्र. 20661 ही रेल्वे बेंगळूर रेल्वे स्थानकावरून सकाळी 5:45 वाजता प्रस्थान करून दुपारी 1:30 वाजता बेळगावला पोहोचेल.